مراجعة جهاز Honor 10

بعد تجربة الجهاز لمدة 3 أسابيع دى مراجعة تفصيلية للHonor 10

هنتكلم عن التصميم و الشاشة و الأداء و الكاميرا و البطارية و شوية حاجات تانية زى السماعة الخارجية و سماعة المكالمات و غيرهم و هنقيم كل حاجة من 10

 

• التصميم

طبعاً التصميم هى أول حاجة هتقابلك فى الموبايل

الموبايل مصنوع من الإزاز مع إطار من الألومنيوم و الحقيقة جودته حلوة جداً

من ناحية الشكل فأكيد مش محتاج أتكلم…فعلاً واحد من أجمل الموبايلات فى العالم و أكثرها جاذبية و جمال…فعلاً تصميم رائع بالذات الونين الPhantom Blue و الPhantom Green اللى لونهم بيتغير حسب زاوية رؤيتك و حسب الإضاءة و كلام تانى كدة المهم بيطلعلك التغيرات المبهرة دى فى الألوان اللى بتخليك كل مرة بتبص على ظهر الموبايل بتنبهر بيه و يعجبك أوى و كإنك لسة أول مرة تشوفه

من ناحية المتانة فهو زيه زى أى موبايل إزاز…لو وقع هيتكسر منك فلازم تحط جراب و طبعاً بيتخدش و بيتجرح رغم إنه مش أوى لكن حرام تبوظ الجمال ده فحطله جراب أحسن…عشان حتى تمنع البصمات و متبوظش شكله

الموبايل حجمه  مش كبير فهتقدر تستخدمه بسهولة بإيد واحدة و فعلاً مسكته مريحة فى إيدك مش هتحس بأى مشاكل

 

• الشاشة

تانى حاجة هتقابلك بعد ما تمسكه و تفتحه هى طبعاً الشاشة

شاشة IPS LCD بحجم 5.84 بوصة و بأبعاد 19:9 و دقة 2280X1080 بيكسل (FHD+) و كثافة بيكسلات 432 بيكسل لكل بوصة

الشاشة مكنش عندى معاها أى مشكلة

الألوان حلوة جداً و مشبعة و بالتحديد و أنت فاتح الVivid Mode اللى بيخلى الألوان جميلة جداً بصراحة…مش زى الشاشات السوبر أموليد مثلاً لكن ما زالت حلوة

مستوى الإضاءة تحت أشعة الشمس كان جيد و كل حاجة على الشاشة كانت واضحة…مش بنفس مستوى الإضاءة بتاع الS9 مثلاً لكنه حلو جداً

 

• الأداء

مش محتاج أقول المواصفات ولا الكلام ده لإن تقريباً الكل بقى عارف المواصفات كويس و مالية المواقع تقدر تخش على أى موقع زى GSMARENA أو عدة دوت كوم تشوفها فأنا هخش فى الموضوع على طول

هنقسم الأداء لكذا نقطة

• الأداء بالنسبة للإستخدام العادى سوشيال ميديا و فيديوهات و تصفح الإنترنت
• الأداء فى الألعاب
• واجهة المسخدم

 

الأداء عموماً لما شوفت مواصفات الموبايل الرهيبة كنت متوقع منه أكثر من كدا…لكن مش معنى كلامى إنه وحش أو حتى لا يرتقى إنه يكون أداء فلاج شيب لا خالص هو كويس جداً لكن كان أقل من توقعاتى

بالنسبة للإستخدام العادى فى السوشيال ميديا و الإنترنت فهو كان جيد جداً لكن فيه مشكلة واحدة…عايز تعرف هى إيه؟…إستنى لما نتكلم عن واجهة المستخدم

أداء الموبايل فى الألعاب الثقيلة كان مميز جداً جداً و لما جيت قارنته بفلاج شيب هواوى من 2017 و هو الP10 حسيت بفرق ملحوظ لصالح الهونر 10 (معايا الجهازين و قارنتهم بنفسى) و فعلاً مش هتاخد أداء أعلى من كدا بالسعر ده

كمان الموبايل هيوصله تحديث بيضيف ميزة الGPU Turbo اللى حسب كلام الشركة هتحسن من أداء المعالج الرسومى و هتقلل من إستهلاكه للطاقة…فى الحقيقة أنا عندى فضول شديد أعرف أداء الجهاز فى الألعاب هيبقى عامل إزاى بعد التحديث

 

نيجى لواجهة المستخدم الEMUI و الحقيقة لو أنت معاك أى جهاز هواوى أو هونر مش هيعجبك كلامى

الواجهة بتقدملك مميزات كثيرة جداً منها الApp Twin اللى بتخليك تقدر تعمل حسابين فيس بوك و واتس آب و ماسنجر

ده غير مجموعة كبيرة و مميزة من الإيماءات (Gestures) بحركات من صوابعك (بالتحديد الحتة اللى بتخبط بيها على الباب) تقدر تاخد سكرين شوت و حركة تانية تقدر تبدأ تسجيل فيديو للشاشة و هكذا

الجزء السئ و المشكلة اللى قولت عليها فوق هو إن الواجهة تقيلة و كابسة على نفس الجهاز و خلاص قربت تفطسه و حصل مرتين إنى كنت قاعد على الفيس و الجهاز من نفسه يخرج بدون أى مبرر و حصلت مرة مع جوجل كروم

طيب هل المشكلة دى ليها حل؟

الإجابة هى أيوة ليها حل…عندك مليون لانشر على البلاى ستور زى نوفا لانشر و Evie لانشر و غيرهم نزل اللى يعجبك فيهم و ده هيخلى الوضع أحسن كثير مما هو عليه

• الكاميرا و هنقيمها حسب إستخدام الشخص العادى بالأوضاع العادية مش فى وضع الPro أو الManual أياً كان الإسم يعنى

أولاً الخلفية

الأولى هى 16 ميجا بيكسل ألوان و الثانية هى 24 ميجا بيكسل مونوكروم و فتحة العدسة فى ال2 هى F/1.8 و هى مفيهاش مثبت بصرى OIS لكن فيها مثبت إلكترونى EIS بيعتمد على الgyroscope sensor و هو كويس لكن مش بنفس مستوى بتاع الOIS اللى بيكون فى الهاردوير نفسه

أداء الكاميرا فى الضوء القوى و العادى فعلاً ممتاز…ألوان مشبعة و حلوة جداً و الDynamic Range جيد جداً و العزل سواء أشياء أو أشخاص شغال حلوة جداً

فى الضوء الضعيف أداء الكاميرا لو هقيمه من 10 هديله 6 لإنك لو هزيت إيدك بتطلع الصورة مشوهة و مهزوزة و لو بتصور ورد أو أى نبات بالليل و كان فيه شوية هواء بيهز اللى بتصوره بردو الصورة بتطلع مهزوزة ده غير إن بيبقى فيه حبة Noise (تشويش) فى الصورة و التفاصيل بتبقى قليلة شوية و جودة الصورة معجبتنيش

بصراحة صدمتنى بعد كل الكلام اللى اتقال عليها فى المراجعات و حتى لما بتبقى مشغل الAI الموضوع مش بيختلف أوى

لكن الحلو إن العزل بردو بيبقى شغال بشكل ممتاز

 

تصوير الفيديو…لو أنت بتصور و أنت ماشى أو بتتحرك مش هيبقى عندك أى مشاكل…أما لو كنت بتجرى أو ماشى بالعربية فى مكان مكسر أو أى حركة عنيفة شوية الفيديو بيطلع دون المستوى و هنا هتحس أوى بغياب المثبت البصرى

 

الكاميرا فيها حبة مميزات حلوة زى وضع المونوكروم اللى بيطلع صور أبيض و إسود فى غاية الجمال و فيه ميزة الSlow Motion ب240 فريم فى الثانية (مش متأكد أوى من الرقم) و فيه ال3D Portrait اللى بيعملك تأثيرات حلوة أوى فى وضع البورتريه

 

نيجى للكاميرا الأمامية

الكاميرا بتيجى بدقة 24 ميجا بيكسل بفتحة عدسة F/2.0

أفضل كاميرا أمامية تقدر تاخدها فى الفئة السعرية دى لحد دلوقتى…أدائها مميز جداً و العزل نادراً ما بيغلط و فيها بردو ال3D Portrait لكن مش بنفس كفاءة الكاميرا الخلفية

الفيديو وضعه لا يختلف عن الكاميرا الخلفية

 

• البطارية

و هنا فيه قسمين من الناس…اللى عاجبه أداء البطارية و بيشكر فيها و اللى مش عاجبه أداء البطارية و مش مبسوط منها فتعالوا نحسم الجدل ده

البطارية سعتها هى 3400 ميللى أمبير…رقم قليل مش كدة؟

لكن فى المقابل المعالج بييجى بدقة تصنيع 10 نانو ميتر فهو موفر فى الطاقة طبعاً

الحقيقة البطارية كانت بتكفينى اليوم مستريح جداً و مكنتش بواجه أى مشاكل و كانت بتعمل معايا أكثر من 7 ساعات Screen On Time ما بين تصفح الفيس بوك و الإنترنت و فيديوهات على اليوتيوب و أنا شايف إنى مجيبتش أخرها و ممكن تعمل رقم أحسن من كدا

 

البطارية كانت بتشحن بسرعة جداً معايا

من 0 ل 50 فى 24 دقيقة و من 0 ل 100 فى حوالى ساعة و ربع

 

 

• شوية الحاجات التانية اللى قولت عليها

السماعة الخارجية Mono مش ستيريو و صوتها نقى و حلو جداً لكن مش عالى أوى…بس علوها مقبول جداً مفيش مشاكل يعنى

سماعة المكالمات صوتها عالى و كويس رغم إن حجمها صغير

النوتش حجمه صغير و تقدر تخفيه لكن هتلاحظه و مش هيوفر فى الطاقة بردو لإن الشاشة  IPS LCD مش أموليد أو سوبر أموليد اللى بتطفى البيكسلات فى اللون الإسود

البصمة فيه ناس بتقول إنها بطيئة و أنا مستغرب جداً من ده…البصمة سريعة جداااا و بتفتح بسرعة و دقيقة جداً…و بتفتح لو إيدك مبلولة لكن ببطئ شوية

الFace ID شغال حلو جداً و بيفتح بسرعة و مش بيفتح إلا و أنت مفتح عينك فده هيديك أمان أكثر لكن مش زى البصمة أو حتى موبايلات شغالة بمستشعر مخصوص للFace ID زى الآيفون X أو الشاومى MI 8

 

 

 

دلوقتى هنقيم كل حاجة من 10

التصميم 10

الشاشة 8

الأداء لو هنقارنه بالفئة السعرية بتاعته هيبقى 9.5 أو 10 كمان لكن لو هنتكلم إنه فلاج شيب و نقارنه بباقى الفلاج شيب يبقى 7.5

الكاميرا

الأمامية 8 فى الصور و 7 فى الفيديو

الخلفية 8 فى الصور و 7 بردو فى الفيديو

البطارية

الأداء 8.5

سرعة الشحن 10

السماعة الخارجية 7.5 لإنها مونو مش ستيريو و صوتها مش عالى أوى

البصمة 10

الFace ID هديله 8 لإنه بالكاميرا مش مستشعر مخصوص لكنه سريع جداً

رأيى فى الموبايل إنه مميز جداً و لو معاك فلوس هاته طبعاً لو مستعجل مفيش أحسن منه بالسعر ده فى السوق حالياً
طيب لو مش مستعجل؟

إستنى الشاومى Mi 8 ينزل السوق

سعره هو 8888 للنسخة ال64 جيجا و 6 جيجا رام و أنا شايف إنه أفضل من الهونر 10 فى كل حاجة تقريباً